Thwisob Beram|| थैसब बेराम||Anemia: Symptoms, Home treatments, and causes.

 


थैसब ( Anaemia , General weakness )

मोनसे थासारि जि समाव थैयाव गोग्गो गोजा थै सेरेप (RBC) नि बिबांआ जोबोद खम जायो। बेनि फिथाइ महरै देहायाव अक्सिजेन खारदिंनाया खमायलाङो जायनि जाहोनाव देहायाव गोबां बिखान्थिया थाबथायो।

बे बेरामा बांद्राय थै थांब्ला, दिसिनट्रि जायोब्ला , बांद्राय स्राब जायोब्ला, बोरसि फिलौ जाब्ला, सौ - सौ खिनाय जायोब्ला, मेलेरिया आरो निमनिया जालुबाय थायोब्ला, गोजा थै सेरेपआ बांद्राय थैयोब्ला जायो । 

सिन एबा लैखोनफोर ( Signs and Symptoms) :

बे बेरामा जायोब्ला मोदोमनि बिगुरा गोमो जायो , मेगन रोमोयो, सालाइ, आसुगुर हाथाइ मोदोमफोरा गोमो जायो, लोरबां मोनो, मेङो। बाराद्रायब्ला आथिं बुयो, बिखा दलब दलब मोनो, हां थोनो थोनो मोनो । बे बेरामा जुदि उन्दैफोरनियाव जायो अब्ला मैला आरो हाब्रुफोर जेरै- न इन्जुर लिरनाय हा बायदिफोरखौ जायो।

जोथोन लानाय (Treatment): 

बे बेरामखौ नोंथांनि लैखोन बादियै गोजौ देहा फाहामसालि आरो मुलिनि हेफाजाबजों फाहामनो हायो।

आरो बे बेरामखौ जों न'आवबो गोबां राहानि गेजेरजों फाहामनो हायो। बेनिनो गाहायाव माखासेखौ सावरायनाय जाबाय। नोंथांआबो बेनि जायखिजाया राहा जाय नोंथांनि थाखाय साबजाथाव बेखौ बाहायनो हागोन-

  1. गाजा खिलिहोनाय ( Sprouts ) :  मटर, बुद, सबाइ, बादाम आरो गम बेफोरनि जायखिजाया मोजाङै सुनानै हरसे ( नङाब्ला 8- घन्टासो ) सोमनानै दोननांगौ । अखानायै फुङाव सोमनाय दैखौ लोंनांगौ आरो बेगरखौ फिन अखानायै फुंआव जानो थाखाइ हिस्रिजों खाथबनानै दोननांगौ। बेखौ गोथाव खालामनो थाखाय थाव गुबै, सामब्राम गोजा, जिरा, गुर-मेथाइ बायदिफोरखौ होदेरनो हायो।
  2. बिदै/सक्लेट ( Syrup / Chocolate ) : सजना बिलाइखौ लाबोनानै मोजाङै सुनानै लाग्रोनांगौ उनाव देग्लिनानै एबा मसायनानै बिनि बिदैखौ बहननांगौ। 500-600 ग्रा: सो गुरु मिथाइखौ दैयाव गलायनानै सरनांगौ। बेनि उनाव सजनानि बिदैजों  लगायनानै खम अर होनानै गथा जाजासिम फुदुंनांगौ। बेजों लोगोसे जिरा , सफ , इलासि दाल सिनि गुन्दै खालामनानै होदेरनांगौ आरो मोजाङै दोननांगौ। आरो जुदि सक्लेट बानायो बिनि लोगोआव 150-160 ग्रा: घिउ, 10-15 ग्रा: डालसिनिखौ गुन्दै खालामनानै होदेरनांगौ आरो बेखौ गथा जाजासिम फुदुंनांगौ। उनाव सक्लेट महरै बानायनानै दोननो नांगौ। बिदैब्ला ओंखाम जानायनि उनाव सामुससेयै सानसेयाव खननै जानो नांगौ आरो सक्लेटब्ला गरसेयै सानसेयाव खननै जानो नांगौ। बेबादि जानाय एबा लोंनायखौ दान मोननैनिफ्राय दान मोनथामसिम खालामनो नांगौ । बेयो मोदोमाव थानाय हिन्जावफोरनि थाखायबो जोबोद मोजां आरो बाहायजाथाव। 
  3. मोदोम सिदोब होनाय ( Rehydration drink ) : गिलाससे कारजि बिदै दैयाव खिबग्रिसे संख्रि , सामुसनै सिनि गलायनांगौ आरो बेखौ दफा दफानि उनाव लोंनांगौ। बेबादि खालामोब्ला खिनाय, दिसिनट्रि, औरैनो मेंला बायनाय बायदिया थाबथायो।
  4. मेथि बाखार ( Methi ) : गिलाससे दैयाव सामुससे मेथिखौ हरसे सोमनानै दोननानै बिदैखौ अखानायै फुङाव लोंनांगौ आरो बेगरखौ हिस्रियाव खाथबना दोननानै उननि सानखालि फुङाव जानो नांगौ ।
  5. आमलाइनि टनिक ( Gooseberry ) : बेखौ बानायनोब्ला 5 कि.ग्रा. आमलाइ फिथाइ आरो 3 कि.ग्रा. सो गुरु मिथाइनि गोनां जागोन । गिबियावनो आमलाइ फिथाइखौ मोजाङै सुना लानांगौ आरो दै रानजासिम फोराननांगौ। उनाव हाफ्लेना लानाय गुरजों लगायनो नांगौ आरो बोसोरसेसिम बाहायनाय हानि थिंख्लि दो, ग्लास एबा प्लासटिकनि बासनाआव थोरोबसे गुर थोरोबसे आमलाइ बे रोखोमै सोनो नांगौ। दोआव दोननाया राहा गोनांसिन एबा साबसिन। बेखौ थावनाय खालामनो थाखाय जिरा, सफ, सिमफ्रि, ईलासि, लं, दालसेनि गुन्दै बेफोरखौ होदेरनो नांगौ । बेखौ गोरायै मुथेनानै हा गोरानाव 40 सानसो फबनानै दोननांगौ । 40 साननि उनाव बहननानै बिदैखौ सरनांगौ आरो बथलाव सोनानै फिन आरो 21 सान दोननांगौ। बिनि उनाव मैला एबा गेदाया गोजासिम दोननानै बिदै गोगो जानायखौ गुबुन आयजेंआव लखबस्लायनांगौ आरो मोजाङै दोननांगौ। बेबादि बानायनायखौ गोबाव बोसोर दोननानै लोंनो एबा बाहायनो हायो। सानसेयाव सामुसनैयै खननै लोंनांगौ । बे तनिका मोजां उन्दुनाय, ओंखाम उखैहोनाय, हजम जाहोनाय गेसटिक आरो गोबां बेरामनि थाखायबो बाहायजाथाव ।
  6. जबा बिबारनि टनिक ( Shoe flower tonic ) : गेजेरनि सालाइ आरो देन्थानि गोथां बाहागोखौ गारनाय जबा बिबार, गुर मिथाइ बुथुमना लानानै साखोन- सिखोन बयामाव जखाथाम बिबाराव जखानै गुर मिथायनि हिसाबै सोनानै  मोजाङै सफा होनानै सान्दुङाव 21 सान दोननो नांगौ बेनि उनाव बिदैखौ सरनानै बथलाव सोनानै गाहामै दोननांगौ । आरो सामुससेयै सानसेयाव खेबनै लोंनांगौ। बे टनिका बिसाख'नि जेंना , गुफुर स्राब आरो गुजुनायनि थाखैबो गाहाम।
  7. दाउदैजों बानायनाय तनिक (Egg - lemon tonic) : दैनैसो दाउदैखौ मोजाङै सुना लानानै ग्लासनि बथलाव लासैयै सोनानै लानांगौ । बेवहाय कारजि बिदैखौ दाउदै लोमनानै से इनसिसो गोजौ जाजासिम सेबनानै होनांगौ आरो खुगाखौ मोजाङै मारिथेनानै 5 निफ्राय 6 सानसिम दोननांगौ । बथलाव थानाय दाउदैया बायब्ला सख्लाखौ सरनानै गारनांगौ आरो मोजाङै गनजों गलायना होनांगौ बेनिफ्राय गुर-मिथाइ फुदुंनाय बिदैखौ गुसु खालामनानै दाउदै बिदैजों समान जखायै लगायनांगौ । बेखौ बथलाव मोजाडै खफा होथेनानै 21 सान दोननांगौ, गोजां बोथोरब्ला सानदुङाव सम सम दिहुननो नांगौ। खाजा जानायनि सिगां सानसेयाव सामुसनैयै खेबथाम जानांगौ । बे टनिकजों हाँफानी ( हांथोनो थोनो जानाय ), टि.बि., गुजुलुबाय थानाय, गगा मोनबाय थानायाबो हामो । 
  8. खान्थालनि टनिक ( Jackfruit tonic ) : राफुनाय खान्थाल खहाखौ बेगरजों लाबजों लानानै बेखौ साखोन-सिखोन बासनाव गुर हाफ्लेनाय थोरोबसे, खान्थाल खहा थोरोबसे बेबादि थोरोबनै एबा थोरोबथामसो होनांगौ । बासननि सिंथाराव गुर मिथाइखौ बुंजासे होनांगौ आरो गाहामै मुथेनानै 21 सानसो दोननो नांगौ । 22 सानखालिनिफ्राय बेखौ जानो हायो। बेखौ सानसेयाव सामुसनै एबा सामुसथामै  खेबथाम लोंनांगौ। बिदैया जोबब्ला ख'हाखौबो खहासेयै सानसेयाव खेबथाम जानो नांगौ । बे टनिका टिबि जानायनि थाखैबो गाहाम। बेनि मोजां फिथाइ मोननोब्ला 6 दानसो आन्थोरज'आजासे जानांगौ ।













🚫 We does not provide medical advice, diagnosis or treatment.