थिर थिर रागा जोंनाय, गोसोजों मोथो मोथो रागा जोंनाय, हरखाबै रागा जोंखांनाय बायदिफोरा रागानि माखासे रोखोमफोर। नाथाइ रागाया माब्लाबाबो मोजां फिथाइ थाइहोनो हाया गुबुनफारसेथिं देहायारि आरो मेलेमारि बिथिंआवसो गोबां गोहोम खोख्लैयो।
रंजाखुसि आरो दुखु-दाहा बादिनो रागायाबो मोनसे जोंनि देहानि मिथिंगायारि आबेग। बेबादिनो माखासे सुबुंआ जोबोद खम रागा जायो नाथाइ खाइसेया जोबोद हरखाब- हरखाबैनो रागा जायो। Journal Cognitive Therapy and Research आव फोसावजानाय मोनसे फरायसंनायनिफ्राय बिगियानगिरिफ्रा बुंदोंदि बेरेखागोसो सोलाइनाय फोरोंथाइ होनाय (Hostile Bias Modification Training) आ मोनसे आदब जायनि जोहै रागानिफ्राय सोमजिनाय जेरै- सुथा लानाय, गाग्लोबलु, फारसेथिंल' हमथाबनाय बायदिखौ होबथानायाव थोजासे मदद खालामो।
बेरेखागोसो सोलाइनाय फोरोंथाइ होनाय(Hostile Bias Modification Training)
बेरेखा गोसो सोलाइनाय फोरोंथाइ होनाय (HBMT)आ मोनसे आदब जेराव सोलोंसाफ्रा बे मोनथाम रोखोमनि बाथ्रा खोन्दोबनि सोमोन्दै फोरमायनानै होनांगोन। बेफोर जाबाय- रोखानङै बाथ्रा, गाग्लोबलु आरो गाग्लोबलुनङै।
रोखानङै बाथ्रा खोन्दोबा गाग्लोबलु आरो गाग्लोबलुनङै मोननैबो रोखोमनि सोदोब दानो हायो। जेरै- अ जों अननाय आरो अरनाय जायो।
गाग्लोबलु बाथ्रा खोन्दोबा गाग्लोबलु सोदोबल' दाजायो जेरैहाय- बुथारनाय। गाग्लोबलुनङै सोदोबफ्रा मोनफा गाग्लोबलुनङै सोदोबल' दाजायो जेरै- र'थ। बे फरायसंनायाव सोलोंसाया गाग्लोबलुनङै सोदोबल' दानो नांगौ आरो जुदि गाग्लोबलु नङै सोदोबखौ साननो हाया अब्ला बिसोरखौ जेबो फिन होनो नाङा होननानै खोनथानाय जायो। बे फरायसंनायनि फिथाइ महरै 24 निफ्राय 46 घन्टानि गेजेराव सोलोंसानि बेरेखा गोसोजों लोगोसे नांज्लायग्रोनाय, रागा जोंहाबनाय बायदिखौ खमायनाय नुयो।
जुदि जों बे फोरोंथाइनिफ्राय जोंनि सानफ्रोमबोनि जिव खुंनायाव मुलाम्फा लानो सानो अब्ला बे फोरोंथाइखौ मोजाङै गुवारै फरायसंनांगोन। बेवहाय खायसे गुदि खोथाफोरखौ सावरायनाय जाबाय जायफोरखौ रागा दबथायनायनि मोजां राहा होननानै मिथिनाय जायो।
1. जायखारथ'नाय-
बेयो बे थासारिनिफ्राय बरग'होनायनि गोरलै राहा नङा जाय थासारिया नोंथांखौ रागा जाहोयो नाथाइ बेयो दुंहाव थासारियाव नोंथांखौ माबा मोनसे बुंनायनिफ्राय गावखौ सामलायनायनि मोनसे मोजां लामा जायनि थाखाय नोंथाङा उननि समाव उनदाहा खालामनो गोनां जागोन। बिनिखायनो जेब्ला नोंथाङा रागा जागोन अब्ला नोंथाङा नोंथांनि खथा एबा समाजनि नोजोरनिफ्राय आन्दोआव जायखारथ' थामहिनबा ओरैबायदि जायगायाव थांथ' जेराव सोमखोर मिथिंगा आरो जिब- जुनारनि अनगा जेबो गैया। नोंथांनि समखौ ला, गोलाव हां बो आरो सान बबेबादि सोदोबा नोंथांनो मोजां फिथाइ होयो आरो बबेबादि सोदोबा नोंथांनि खहा लाबोयो। जुदि नोंथाङा निजोम जायो, नोंथांनि साननायखौ गोसायै बुंं, मानोना निजोम गोसोनि साननाय आरो थांखिया गोख्रों जायो।
2. नोंथांनि सोदोबखौ गोसोखां
जुदि नोंथाङा रागा जायो, नोंथाङा बुंनो नाजागोन गासैबो सानथिफोरा सोद्रोमथि गैयै।नोंथाङा ओरैबादि सोदोबखौ बाहायनो दा नाजा जाय सोदोबा गुबुन सुबुंखौ हेउ सानो एबा निनदा सानो एबा दायगोनां होनना फोरमान खालामो। खायसे सोदोब जेरै- "माब्लाबाबो" एबा "अरायबो" बेफोर सोदोबखौ बाथ्रा दानथेनायाव नोंथांनि सायख'जाथाव सोदोब महरै दा बाहाय मानोनाक् बेफोरबादि सोदोबा जोंनि गेजेराव गोबां फारागथि लाबोयो। गोरोन्थिखौ आसि दिन्थिनायनि सोलाय अरायबो जेंना सुस्रांनाय गोसोखौ बोजब आरो इयुननि थाखाय थांखि एबा बोसोन ला। "नोंथाङा अरायबो गोबावैसो सफैयो" होननायनि सोलाय "नोंथाङा इयुननि समाव थाबै सफैनायब्ला आं जोबोद गोजोनगौमोन।" बायदि बाथ्राफोरखौ बाहायनो नाजानांगौ।
3.देंखोनि हेफाजाबै
देंखोनि गोहोआ जोंनि गोसोखौ मिनिटनि गेजेरावनो सोलायहोनो हायो। देंखोआ गोसोखौ निजोम आरो गोजोनग्लाइहोनो हानायनि सोमोनांथाव गुन दं जाय जोंखौ गुरै साननाय थासारिसिम लाबोयो। देंखोखौ मेलेमनि सिखितसा खालामग्रा डक्टरफोरा गोबां मानसिनि रागाखौ दबथायनो थाखाय गोहोगोरा आगजु एबा हाथियार हिसाबै बाहायबोदों।
2015 माइथाइनि जारनेल सेग आव फोसावनाय मोनसे फरायसंनायनिफ्राय मिथिना मोनोदि जाय सुबुंआ रागा दबथायनाय मावखान्थि नि जोहै देंखोजों फाहामथाइ होनायखौ मोनो बेयो सानफ्रोमबो रागा दबथायनाय आदब फाहामथाइ मोननायनिख्रुय साबसिन एबा बेहा बांसिन रागा दबथायनायनि गुन थायो।
4. सुग्लाइहोनाय ब्याम एबा सर' खालामनाय
जेब्ला नोंथाङा रागा जायो, नोंथाङा बे थासारिनिफ्राय बारननानै खायसे गोरलै गोसो सुग्लायहोग्रा आदब एबा खायदाखौ सर' खालाम, जेरै- गोलाव हां लानाय आरो हगारनाय एबा मेडिटेसन (10 मिनिट) आरो जुदि जाथावो खायसे गोरलै यग आसनफोरखौ खालामनो नांगौ। यगआ जोंनि गोसोखौ निस्थुर खालामनाय आरो सुग्लायहोनायजों लोगोसे साननायखौ गोथों खालामो। नङाब्ला नोंथाङा गुबुन आदब बाहायनो हायो। जेरै- पार्कआव बेरायग्लांनाय एबा सावगारियाव गाब होनाय बबेयो नोंथांनि साबजाथाव।
5. साननायफोरखौ थांनो होनाय
नोंथाङा जुदि मोनसा गोसोखौ हमथाबना लायो सानना लादो नोंथांनि जिवाव सुखुआ फैनो अरायबो गोब्राब मोनगोन। जुदि नोंथाङा रागा फोजोंग्रा सुबुंखौ निमाहा होनो हाया अब्ला नोंथाङा अराय समाव रागा जोंनायैनो सान थांगोन, गुबुनजों लोगोसे नोंथांनि जिवनि थांखियावबो जोबोद गोहोम खोख्लैगोन। बिनिखायनो जेंनाखौ बोफ्ले जेसेबां हागौ, नोंथांनि मोन्दांथिखौ फोरमाइ, उल्था साननायखौ बोस्रां आरो बैसोर सुबुंखौ निमाहा हो जायनि थाखाय नोंथाङा रागा जोंदों। आरो बेबादि नोंनि निमाहा होनाय आखुआनो नोंसोरनि सोमोन्दोखौबो गोरा खालामगोन।
